لە پەیمانگەی تەکنیکی کوردستان پانێڵێکی زانستی لەسەر «شەکر، شیرینکەرە سروشتییەکان یاخود شیرینکەرە دەستکردەکان» بەڕێوەچوو

ڕێکەوت : 11 - Oct - 2026

لە چوارچێوەی چالاکییە ئەکادیمی و زانستییە بەردەوامەکانیدا بۆ هۆشیارکردنەوەی کۆمەڵگە لە ڕووی تەندروستی و خۆراکییەوە، پەیمانگەی تەکنیکی کوردستان پانێڵێکی زانستیی تایبەتی لەژێر ناونیشانی:

«بژاردە شیرینەکان: شەکر، شیرینکەرە سروشتییەکان یاخود شیرینکەرە دەستکردەکان»

لە هۆڵی کۆنفرانسی شێخ فاخر شێخ تەیب قەیوانی، بە ئامادەبوونی ژمارەیەک لە پسپۆڕان، مامۆستایان و فێرخوازانی پەیمانگە ئەنجامدا.

تەوەرەکانی پانێڵەکە:

لە میانی پانێڵەکەدا، بە شێوازێکی پزیشکی و زانستیی ورد تیشک خرایە سەر یەکێک لە باوترین پرسە تەندروستییەکانی سەردەم، کە ئەویش جیاوازیی نێوان شەکری ئاسایی و جێگرەوە سروشتی و دەستکردەکانیەتی.

پانێڵیستەکان تاوتوێی کاریگەرییە نەرێنی و ئەرێنییەکانی ئەم شیرینکەرانەیان لەسەر جەستەی مرۆڤ و نەخۆشییە درێژخایەنەکان (وەک شەکرە، قەڵەوی و نەخۆشییەکانی دڵ) کرد. هاوکات لە ڕوانگەی زانستی دەرمانسازی و ژەهرزانییەوە، پێوەر و ڕێژەی سەلامەتیی شیرینکەرە دەستکردەکان (وەک ئەسپارتام) و مەترسییەکانی بەکارهێنانی لەڕادەبەدەریان ڕوونکرایەوە، لەگەڵ خستنەڕووی ڕێنمایی زانستی بۆ دەستنیشانکردنی تەندروستترین بژاردە بۆ سیستەمی خۆراکی ڕۆژانە.

پانێڵیستە پسپۆڕەکان:

م. هدی غفور ڕەوف - مامۆستا لە پەیمانگەی تەکنیکی کوردستان.

د. سانا ماجد محمد - پزیشکی دەرمانساز و ماستەر لە دەرمانسازی و ژەهرزانی.

د. سەلمان جاف - پسپۆڕی کلینیکی خۆراک لە نەخۆشخانەی هیوا.

بەڕێوەبەری پانێڵ:

د. نزا بورهان ئەحمەد - مامۆستا لە پەیمانگەی تەکنیکی کوردستان.

لە کۆتایی پانێڵەکەدا، دەرگای گفتوگۆ و ئاڵوگۆڕی بیروڕا بۆ ئامادەبووان کرایەوە و لەلایەن پسپۆڕانی پانێڵەکەوە وەڵامی سەرجەم پرسیار و تێبینییە تەندروستییەکان درایەوە بە مەبەستی گەیاندنی هۆشیاریی تەواو بە فێرخوازان و ئامادەبووان.

<< >>